Distance Healing

Ano ang tinatawag na absent healing?

(Halaw sa  Paabot Diwa, Dec 1968)

Ang panggagamot sa pamamagitan ng pag-iisip ay tinatawag na “absent healing“o “distance healing“.  Sinasabing ito ang pinakamainam na paraan ng panggagamot, lalo pa at kung lahat nga lamang ng pangangailangan ay matutugunan.

Sinasabing ang sinumang humiling sa lihim ay hindi pahihindian kailanman, lalo pa kung ang paghingi ay para sa kapakanan ng kapwa, ‘ukol sa mga nilikhang tinutulungan, kahit na lingid sa kanilang kaalaman.’

Ang gawain ay tumatagal ng 30 minuto kung kailan ang mga kabilang na kasangkapan ay nagkokonsentrasyon, nananalangin at pagkatapos ay binabasa ang talaan ng mga kapatid na tinutulungan. 

Sa bawa’t banggitin ng pangalan ng isang kapatid, pinagtutuunan ng pag-iisip ng bawa’t isa ang kanyang kaanyuan, at gayon din ang karamdaman ng kapatid na tinutulungan.

Ang gawaing ito ay maikli at payak kung ating titingnan, subalit napakalaki ang nagagawa, hindi lamang sa mga may karamdamang tinutulungan, kungdi maging sa mga kasangkapang nagsisikap tumulong. Ang paglunas sa karamdaman ng isang kapatid ay paglunas din sa kanyang sariling kahinaan.

Maging tayo man ay kasangkapan o hindi, marahil ay mayroon din tayong maibabahagi. Kinakailangan lamang ang pananahimik, ang pakiki-ugnay at higit sa lahat ay ang taos-pusong nasaing makatulong at maibsan ang ano mang karaingang dinadalas ng ating kapwa. Ang tumulong ay hindi madali, humingi ng pagsisikap at tiyaga, subali’t nagagawa.

2011-02-023 


        

The Spirit (Ang Espiritu)

Mayroon ba ng tinatawag na Espiritu?

Ang mga alinlangan tungkol sa pagkakaroon ng Espiritu ay nagmula sa kamangmangan tungkol sa mga tunay kalikasan ng mga ito. Ang mga tao ay karaniwang inisip na ang mga Espiritu ay isang bagay na hiwalay sa lahat ng mga nilikha.

Anuman ang mga ideya na mayroon tayo tungkol sa mga Espiritu, ang paniniwala sa pagkakaroon nito ay batay sa pagkakaroon ng isang intelihenteng prinsipyo na naiiba sa materya; at ang kapaniniwalaan na walang espiritu ay hindi kaayon at isang lubos na pagkakaila sa prinsipyong ito.

Aming inaakala, bilang batayan ng aming paniniwala, ang pagkakaroon ng buhay, at sariling katangian ng kaluluwa, na kung saan ang Espiritualismo ay ang teoretiko at dogmatikong kahayagan, at Espiritismo ang mga praktikal na patunay.

Saan maihahanlintulad ang tinatawag na Espiritu?

Sa pagsunog ng papel, puti ang kulay ng usok, at sa pagsunog ng plastik, itim ang usok ng lumalabas. Ang usok na ito ay magaan kung kaya ang kanyang paggalaw pataas ay patungo sa himpapawid. Maputi man o maitim na usok pareho silang aakyat paitaas subali’t kapag bumigat ang maitim na usok ito ay muling bababa sa lupa sa pamamagitan ng ulan.


Ang usok (vapor, gas) ay magsasama sama at ito ay namamasdan ng ating mga paningin bilang mga ulap. Ang ulap ay may iba’t ibang uri na siyang nagbibigay ng panahong darating sa hinaharap.

Ang isang uri ng ulap na mga tila bulak at puting puti na tinatawag na stratus at ang isa naman ay ang cumulus-nimbus na kapag ito ay dumadaan, mapapansin na ito ay may kalakihan at may pagdidilim ng kapaligiran at susunod ang pag-ulan. At ito ang siyang nagiging gabay natin na ang panahon ng tag-ulan ay malapit nang dumating.

Ito ang mensahe (Abotsabi – 05/19/1996)

An Espiritu ay maaaring maihalintulad sa ulap; sa mga likido na tinuyo ng matinding init upang maging ulap.

Ang Espiritu ay katulad ng ulap; may kaputian, at may kadiliman, may kataasan, may kababaan. At dahil ang ulap na may kadiliman ay nasa higit na mababang kalagayan kaysa sa mga ulap na may kaputian. Ang ulap na may kadiliman ay higit na mabigat kaysa sa puting ulap. 

Ang ibig lamang ipakahulugan, bumigat dahil sa maraming bagay-bagay na dala ng ulap na ito. At ang bigat na ito ay darating ang panahon na di niya makakaya at ito ay ibubuhos niya pabalik sa lupa.

Ganyan din ang Espiritu o kaluluwa at sa may pangitain ang kulay ay kanyang makikita. Ang Espiritu na nasa mataas na antas at kabusilakan ay isang kaliwanagan, ang Espiritu na nasa kababaaan ay nasa kagulumihanan.

Kung darating ang sandali na ang tao ay mag-iwan ng katawang-laman kapag nasa kabusilakan ay hindi na muling magbabalik sa lupa sapagka’t siya ay dodoon sa kanyang tunay na bayan, ang bayan ng mga Espiritu. At kung nasa kadiliman, ang Espiritu ay tulad ng ulap na muling bababa sa lupa at magkakaroon ng muli at muling buhay upang ang ulap na iyan ay magkaroon ng kawagasan at kalinisan.

2011-02-016

The Brain

Alam ba ninyo na ang utak ay isang uri ng “clearing house?”

Ang utak ay isang uri ng “clearing house.” Ito ang tagatanggap ng lahat ng karanasan na sinasala ng utak upang ipamahagi ang mensahe sa lahat ng bahagi ng katawang-laman. At dito ang tao ay nagkakaroon ng paggalaw (reaksyon). Halimbawa, kapag nakakita ng sunog (karanasan) apektado ang damdamin (takot), apektado ang pag-iisip (ano ang dapat gawin).

Kapag buo ang kalooban (will) isasakatuparan ang mithiing mapatay ang sunog upang maalis ang takot. Dito nagkakaisa ang damdamin, isip at kalooban. Kapag ang isang laman at damdamin ang nagkaisa dahil sa matinding takot, naduwag at nasira ang kalooban ng tao ay nagpapanik o natataranta, hindi makakilos, at sa bandang huli ang pagisisisi.

Saan itinatala ang tinatanggap na mga karanasan ng utak?

Ang lahat ng mga karanasang na tinatanggap ng utak ay kanyang itinatala sa kaluluwa o sa pamamagitan ng peri-espiritu. Kapag ito ay nakatala na sa kaluluwa, dito ang lahat ng karanasan ay hindi malilimutan. Sa gunita na naka-ukit sa isang kaluluwa, may mga bahagi nito na pansamantalang malilimutan sa oras ng kamatayan.

Halimbawa, ang isang manunugtog ng piano. Sa dating kabuhayan, ito ang kanyang gawain at hindi na mabilang ang kanyang nalikha at ang kanyang pag-eensayo. Sa muling kabuhayan, sa ibang katawang laman ibinibigay muli ito ng kalikasan sa isang bagong katauhan bilang isang kapangyarihang makatugtog kahit na sa murang gulang pa lamang. At ito ay nagaganap at magaganap sa ilang salin ng muli at muling pagkabuhay.

Ang isa pang aspeto tungkol sa karakter ng isang pagkatao na ang ibig sabihin ay mga resulta ng isang karuwagan or katapangan (tulad ng naunang halimbawa kapag may sunog) sa pagharap sa mga suliranin sa buhay, ang nag-uukit ng malalim na guhit (grove) sa kaisipan kung kaya at nagkakaroon ng ugaling naitatag (established traits) ng kanyang pagkatao.

Kaya nga minsan, may mga tao na may mataas na antas ng pagkatakot (phobia) na maaaring nakuha niya noong nagdaang kabuhayan. Halimbawa, noong unang kabuhayan ay namatay sa pagpapahirap o torture. Ito ay nauukit sa gunita na natatala sa kaluluwa. Sa muling pagkabuhay ang katawang laman na magdadala sa kaluluwang ito ang magdaranas ng pobya na ito.

2011-02-012

Memory (Gunita)

Ano ang tinatawag na gunita (memory)?

Ang gunita ay ang kakayahang maibalik ang ilang larawan o mga kaganapan sa loob ng isang kaisipan. Sa unang tingin, ito ay waring sumasandig sa kalagayan ng utak. Kaya nga, kapag tumatanda na ang tao, mahirap nang maka-alala.

Sabihin nating tayo ay hindi pa matanda, nasa kabataan o katanghalian ng gulang, sa isang pag-upo at pagninilay-nilay magagawa kaya natin na maalala ang lahat ng ating ginagawa ng buong maghapon noong nakaraang linggo?

Marahil ay oo, kung palagi tayong naglilista ng ating nagagawa sa araw-araw. At marahil ay hindi, sapagka’t sa paglipas ng isang araw ay dagdag karanasan na naman ang susunod na isang buong araw na darating; at ilang taon na ba tayong nabubuhay sa lupa?

Sa siyensya ng Sikolohiya, ang lahat ng karanasan ay nagkakaroon ng pagka-ukit, bakas o impresyon sa ating kamalayan (consciousness). Maging ang mga kaganapan na minsan ay hindi napagtuunan ng ating gising na kamalayan (waking consciousness).

Ang mga aspeto ng isang kabuuan:
1. Kamalayan
    a. May kamalayan (conscious)
        1) pag-iisip (thought)
        2) pinahahalagahan (values)

        3) damdamin (emotion)
   b. Walang kamalayan (unconscious)
       1) panaginip (dream)
       2) pangitain (vision)
       3) naglalaman ng lakas na nakalilikha (creativity)

2. Pakikisalamuha
    a. Pagkahilig sa pag-iisa ( introvert, intoversion)
    b. Pagkahilig sa pakikisalamuha sa iba (extrovert, extroversion)

3. Kasarian
   a. Katangian ng isang lalaki. Ang katangiang babae sa isang lalaki ay tinatawag na
      Anima.
   b. Katangian ng isa babae. Ang katangiang lalaki sa isang babae ay tinatawag na 
      Animus.

4. Pagkilos
     a. aktibo
     b. di-aktibo

Paano napapaunlad ng isang kabuuan?

Mapapaunlad ang isang kabuuan kung mayroon na ng pagkilala na tayo ay hindi buo at maraming kakulangan at ang karanasang ito ang magtutulak upang umunlad ang ating kakulangan.

2011-02-011

Spirit Communication (Pag-ugnay)

Ano ang tinatawag na pag-ugnay o ang umu-ugnay?

Ang pag-ugnay ay ang estado o kalagayan ng pagtanggap at pakiki-isa na maaaring mangyari sa mga nilikhang may buhay maging sa mga hayop man, sa mga kaibigan at kamag-anak, mga kamag-anak na lumisan na, mga espiritung nasa mataas na antas ng kawagasan, mga bahagi ng ating pagkatao o kaya ay mga bahagi ng ating sarili na nasa mataas na antas na ating nakakaligtaan.

Kapag sinadya ang pakikipagniig o pakikipag-ugnay, ating pinalalawak at pinahahaba ang mga sandali na tayo ay nakikibahagi sa isang realidad ng isang likha (tao) at di likha (espiritu). Isinaisangtabi natin ang ating sarili ay maki-isa sa isang kaluluwa o nilikha sa isang pinahabang panahon o sandali.

Lahat tayo ay nakagagawa ng bibrasyon o tunog habang ang molekula sa ating katawan ay gumagalaw sa ating kakaibang huwarang henetiko (genetic pattern). At lahat ng mga nilikhang may buhay ay may kanya-kanyang prikwensya ng bibrasyon (vibrational frequency). Kapag tayo ay nakiki-ugnay at nakiki-isa sa ibang nilikha, ang ating kakaibang bibrasyon ay nagkakapanabay (synchronized) at tayo ay sabayang nagkakaroon ng ugnayan ng bibrasyon.

Ito ang mensahe, (Abotsabi ng Propeta Uriel 10/17/93)

Bago sumapit ang takdang sandali ng inyong pakikipag-ugnay, nawa ay nasa sa inyong puso na ang inyong sariling paghihintay ay malimutan na ninyo ang mumunting pagkakasala ng inyong mga kapatid, napatawad na ninyo ang sa inyo ay nagkasala, nabigyan na ninyo ng magandang pag-asa ang mga nalulungkot at nagdudusa, naging mabuti kayong kahinlog ng inyong mga kabiyak, naging mabubuting anak ng inyong mga magulang, lalong lalo na ang mga kabataan kung mayroon man kakulangan ang inyong layunin, samakatwid, kahit saan dadalhin mo sa iyong sarili sa isang likas at taimtim na pakikipag-ugnay sa kaitaasan.

2011-02-010

Spirit vs. Soul ( Espiritu vs. Kaluluwa)

Paano nagkaiba ang Espiritu sa Kaluluwa?

Ang Espiritu

Ang Espiritu ay siyang prinsipiyong matalino ng buong paglalang (creation). Siya ang diwa, wagas at walang hanggan. Hindi siya saklaw ng panahon (time) at puwang, patlang o espasyo (space). Siya ay sumasa lahat ng bagay. Ang simulaing matalino ang siyang katunayan na mayroong Diyos sapagka't hindi matatanggap ang Mataas na Kapangyarihan kung ang paghaharian lamang ay ang mga bagay na walang katalinuhan, tulad ng hindi ipagkakaroon ng Dakilang Hari kung ang paghaharian ay mga bato lamang.


At sapagka't hindi maunawaan ang Diyos nang hindi nag-aangkin ng Kanyang karuonan (attributes), ang mga sagisag na ito ng Diyos ay nawalan ng kabuluhan kung sa materya lamang gagamitin. Ito rin mga karuonang ito ang siyang isinangkap sa bawa't espiritu upang maihayag ang kanyang katalinuhan, kaya nga at siya ay sumusulong hanggang makasapit sa kalagayang lubos na nauunawan at natatanggap ang mataas na munakala ng sa kanya ay lumikha.
Ang espiritu ay may kalayaan sa pagpili ng laman na kanyang gagamitin sa kanyang pagbabayad-utang (atonement, expiation) o misyon. Ang kapaligiran na kanyang pinakikisamahan, ay siyang mahalaga sa ikatutupad ng kanyang tungkulin.

Kaya nga at mayroong pangyaya rin na kung ang paligid na kinagisnan ng sanggol ng kanyang gagamitin sa isang kabuuan, ay magiging sagabal sa katuparan ng kanyang pagbabayad-utang o ganapin ang isang kabuhayan, ito ay kusa niyang iiwan sa pamamagitan ng pagpatid sa pluwido o peri-espiritu na nag-uugnay sa materya upang siya ay makahanap ng bagong sanggol na ang paligid ng mga magulang ay naa-angkop sa kanyang pangangailangan o tuparin.

Ang Kaluluwa

Marami ang opinyon tungkol sa kaluluwa.  Aking ibibigay ang iba’t ibang pagkukuro upang buhat dito ay magkaroon ang bumabasa ng kanyang sariling pagsasaliksik at makabuo ng isang magandang larawan kung ano ang isang kaluluwa para sa kanya.

Ang kaluluwa ay siyang prinsipyong buhay ng katawang laman.  Ang sabi ng iba, ang kaluluwa ay hindi sumibol sa kanyang sarili at mawawala rin kapag ang katawang laman ay mamatay.  Ang wika ng mga taong naniniwala sa materialismo ang kaluluwa ay kasanhian (effect) at hindi ang kadahilanan (cause).


Ang ibang panig  ay nagsasabing ang kaluluwa ay siyang prinsipiyo ng karunungan, isang karunungang unibersal (universal agent) na kung saan lahat ng taong nilalang ay napagkalooban ng isang bahagi.

Ayon sa kanila, sa buong sangkalawakan (universe) ay mayroon lamang isang  kaluluwa na siyang namamahagi ng talsik ng kanyang kaluluwa sa lahat ng mga nilalang na may talino, sa kanilang kabuhayan;  ang bawa’t talsik na ito, sa kamatayan ng nilalang na iyon ay mabubuhay at babalik sa kanyang pinanggalingan at ito ay muling sasama sa kabuuan ng isang kaluluwa.

Tulad ng isang ilog, na babalik sa dagat na kanyang pinagmulan.  Kaya nga sa kamatayan, ang paniniwala ay nawawala na ang pagkilala sa sarili (identity).

Ayon sa kanila, ang isang Pangkalahatang Kaluluwa (Universal Soul) ay ang Diyos at ang bawa’t nilikha ay may bahagi ng pagka-Diyos.  Ito ang kapaniwalaang Panteismo (Panteism).

At sa pangkat ng Spiritualist  naman, ang isang kaluluwa ay isang nilalang ng kabutihan (moral being) hiwalay at walang kaugnayan sa materya at ang kaluluwa na pagpepreserba o napapanatili  ng  kanyang indibiduwalidad sa kamatayan.

Ang pagtanggap ng salitang “kaluluwa” ay siyang pangkalahatang tinatanggap sapagka’t bagaman at iba iba ang katawagan, ito pa rin ang tinutukoy sa isang nilalang na nabubuhay sa pagkamatay ng isang katawang-laman.  At ang doktrinang ito ay siyang ginagamit sapagka’t sila ay naniniwala na ang kaluluwa ang kadahilanan (cause) at hindi kasanhian (effect).

At dahil may tatlong pangkat na nagkakaiba sa kung ano ang kaluluwa, kung kaya at tatlo rin ang ibig ipakahulugan ayon sa katuruan kung kaya at upang matanggap ng higit na nakararami ang salitang “kaluluwa” ay tatawagin kong isang nilalang (being) na walang anyo at hugis at isang indibiduwal na nilalang (individual being) na nananahan sa atin, at walang kamatayan.


Ito ang mensahe. (Halaw mula sa abotsabi 08/07/1968, Centro Heneral)

Ang kaluluwa ay bihisang eteriko (ethereal envelope) ng espiritu. Ang kaluluwa ay hindi wagas, may hangganan, nagbabago-bago. Saklaw siya ng panahon at pook. Ang kaluluwa ay mga nagkasamasamang atomo (atoms) at iba pang elemento sa ika-apat na dimensyon (4th dimension).

Siya ay bagting na ginagamit ng espiritu sa paglangkap sa materya, at sa bawa't paggamit ng laman sa iba't ibang kapanganakan, ay iba't ibang uri ng elemento ang kanyang ginagamit, sang-ayon sa antas ng planeta na kanyang gaganapan ng mga bagong tungkulin.

Ang paglangkap sa katawan ng sanggol, ay nagsisimula sa tiyan pa ng ina sa gulang na humigit kumulang sa limang buwan, na siyang simua ng pagkilos ng sanggol sa tiyan. Inihihiwatig ng mga pangyayari na sa pag-uugnay ng espiritu at kaluluwa at sa panahon ng paglalangkap sa sanggol nagsisimulang humayag ang simulaing buhay (vital principle), hanggang sa pagluwal ng sanggol sa liwanag at hangin, ay nagigising naman ang mga pandamdam (senses) ng kataon. Habang lumalaki ang sanggol, umuunlad ang mga sangkap kasabay ang paglikas ng mga pandamdam ng katawan.

Ang prinsipiyo ng buhay ay humahayag din sa mga nilikhang hindi organiko (inorganic) tulad ng halimbawa ng hayop at halaman na pinakikilos pa rin ng buhay na walang kaisipan. Ang hayop, maging ang halaman ay gumagalaw sa udyok ng guni-guni o instinkgto (instinct), upang mapanatiling maayos ang kanilang sarili sa kanilang pakikisama sa kanilang kapwa.

Dahil dito, maliwanag na ang espiritu ay may naiibang buhay kaysa materya, sapagka't ang katalinuhan at pag-iisip ay kanyang mga sagisag, at samantalang ang materya ay hindi nagtataglay nito, ay mahihinuha na ang panangkap materyal at espirituwal ay dalawang simulaing bumabalangkas sa boung paglalang. Ang elemento espirituwal na nagsasarili ay siyang iba't ibang katawan sa kalagayang organiko at di-organiko.

Ang pagsulong ay siyang tadhana sa mga kinapal na espiritu, at ang kaganapang malapit para sa kanyang layunin at sapagka't nilalang ng Diyos na magpasawalang hanggan, marahil, ay mayroon na ng nakarating sa kaitaasan ng huling baitang ng pagsulong.

Ang kapatagang Lupa (planeta tierra) ay isa lamang sa mga kapatagan, at bago ito sumipot sa kalawakan, may papawirin na pinanahanan na ng maraming espiritu na nasa lahat ng antas ng pagsulong, buhat sa mga nagsisimula pa lamang sa buhay hanggang sa mga espiritung wagas, na kung tawagin natin ay mga Anghel, Kerubin at Serapines. Si Socrates, Buddha, Mahomma, Konfusiyo, Hesus, at marami pang iba, ay mga nauna lamang makatapos sa huling baitang ng pagkasulong.

2011-01-21

Vital principle (Prinsipiyo ng buhay)

Alam  ba ninyo ang tinatawag na prinsipyo ng buhay?

Upang lalong maging maliwanag ang kahulugan ng “kaluluwa”, kailangan nating gamitin ang salitang prinsipyo ng buhay ( principio vital o vital principle) upang tukuyin ang buhay ng material o katawang laman, na kung saan man ito nanggaling ay nasasa lahat ng mga nilikhang may buhay, mula sa halaman hanggang sa tao.  Ang isang nilikhang walang pag-iisip ay maaaring mabuhay  tulad ng halaman, kaya nga ang principio vital ay hiwalay at hindi nakasandig dito.


Ayon sa iba, ang prinsipyo ng buhay ay isang kaangkinan ng materya, isang kasanhian (effect) na mangyayari kung saan mayroon materya na makikilala sa iba’t ibang kalagayan.

At sa ibang palapahaman, ang prinsipyo ng buhay ay nananahan sa isang pluwido na nanggagaling sa uniberso (fuerza vital, vital fluid).  Ito ang pluwido ng buhay na siyang sinisipsip  (absorbs) ng bawa’t nilikha at nilalagom (assimilates) ang isang bahagi habang siya ay nabubuhay. 

Katulad ng gas o hangin na humihigop ng liwanag, ang prinsipyo ng buhay ay sa wari ay katulad ng pluwido ng buhay, na siya naman pinaniwalaan sa katulad ng buhay na pluwido ng elektrisidad na tinatawag na magnetic field.

Kahit ano pa ang itawag sa prinsipyo ng buhay, may isang bagay ang may katiyakan, na ang mga nilikhang may katawang laman ay mayroon sa kanilang sarili ng isang lakas (fuerza, force) na matagal nang nananatili na siyang nagbibigay phenomena na tinatawag na “buhay” (life). 

Na ang buhay pisikal ay karaniwan sa lahat ng may katawang-laman kahit na walang katalinuhan at pag-iisip. At ang katalinuhan at pag-iisip ay mga pakultad (faculties)  ng isang uri ng mga nilikha, at sa lahat ng mga nilikha na pinagkalooban ng talino at pag-iisip na siyang nakakahigit sa lahat ng  mga nilkha, ang tao.

Kaya nga at higit na nararapat na hiramin ang mga sumusunod ng kaalaman:

1.  Kaluluwang buhay (vital soul) na siyang prinsipyo ng buhay materyal ay pangkaraniwan salahat ng nilkhang may katawang laman.

2.  Kaluluwang matalino (intellectual soul) na siyang prinsipyo ng karungan na siyang kaangkinan ng tao at hayop.

3.  Kaluluwang espirituwal (spiritual soul) ukol sa prinsipyo ng indibiduwalidad sa kabilang buhay na kaangkinan ng tao lamang.

Samakatwid ang tao ay may kaluluwang buhay, kaluluwang matalino at kaluluwang espirituwal.

2011-01-020 

Theory of the Soul (Teorya ng kaluluwa)

Ano ang napapaloob sa teorya na ang kaluluwa ay walang kamatayan?

Ang mga kaluluwa na pumupuno sa kalawakan at walang kamatayan, sa katotohanan, ay laman ng isang teorya, bagaman isa sa higit na makatwiran kaysa sa iba pang mga teorya; ngunit ito ay isang bagay na nagtataglay ng isang teorya na hindi salungat sa katwiran o siyensiya.


At kung bukod doon, ang teoryang ito ay may batayang may katotohanan. Dapat rin na tanggapin na ang ating paninindigan ay higit na pinagtibay ng dahilan at karanasan. Ang mga gayong makatotohanang batayan ay ating iginigiit, ipinagkakaloob sa pamamagitan ng penomena ng manipestasyon o paghahayag ng espiritu, na siyang bumubuo sa hindi maitatangging katibayan na mayroon at ang pagkakaroon ng buhay ang mga kaluluwa.

Sa mga maraming mga tao, gayunpaman, ang kapaniniwalaan ay nagtatapos dito; madali nilang natatanggap ang pagkakaroon ng mga kaluluwa, at gayun din ang mga espiritu, ngunit hindi nila matanggap ang posibilidad na pagkakaroon na mga komunikasyon sa kanila, dahil,"anila,"ang mga nilikhang hindi materyal tulad ng mga espiritu ay hindi nagkakaroon ng aksyon sa mga taong may katawang materyal."

Ang pagkakait na ito nalikom mula sa kamangmangan tungkol sa tunay na kalikasan ng mga espiritu, tungkol sa kung saang mundo sa pangkalahatan ay mayroong lubhang taliwas ng mga ideya, hindi wasto tungkol sa kanilang pagtanggap na ang mga ito ay abstraktong mga nilikha, bilang isang bagay na hindi maliwanag at walang katiyakan; na siyang isang malaking pagkakamali.

Halaw sa “The Mediums Book”, Allan Kardec

2011-01-019

Theory of Plurality of Worlds (Ang teoriya ukol sa Maraming mga Daigdigan)

Ano ang teoriya tungkol sa karamihan ng mga daigdigan (plurality of worlds)? 

Ano, kung tatanungin, ang nangyayari sa mga kaluluwa na dumarami at dumarami sa walang hanggan sa pamamagitan ng teoriya ng karamihan ng mga daigdigan, ngayon na ang astronomiya at helohiya (geology) ang nag-aalis ng kanilang matandang tinatahanan?

Sa katanungang ito, ang sagot namin ay, ang doktrina na dati ay nagsasabing ang unibersal na espasyo ang siya rin na nakikita na isang malaking sistema, sa kalagitnaan kung saan tayo nabubuhay, na siyang sumasakop sa ating ng walang paghinto.

Mayroon baga na hindi katanggap-tanggap sa gayong teoriya, kahit na anong bagay na tila taliwas sa ating katwiran?

Hindi nga, sapagka’t ang ating katwiran ang magsasabing iyon na nga at di mapasusubalian. Subali’t, maaaring itanong, ano ang magiging kahihinatnan ng doktrina tungkol sa gantimpala o parusa sa hinarap na buhay, kung aalisan sila ng kanilang espesyal na kalalagyan?

Halaw mula sa “The Mediums Book”, Allan Kardec

2011-01-018

Perispirit (Ang Peri-espiritu)

Ano ang peri-espiritu?

Ating isaalang-alang ang espiritu tungkol sa punto ng kanyang pakikipag-unyon sa katawan laman. Ang espiritu ay ang prinsipal na nilikha, sapagka’t ito ay may pag-iisip at walang kamatayan, at ang katawang laman na siyang bumabalot, ay isang damit, isang materya, na huhubarin ng espiritu kapag ito ay lumisan na, at isa pa bukod sa ito ay balot na materyal , ang espiritu ay may ikalawa na dito ay bumabalot, isang semi-materyal, at kung saan ito sumasama sa espiritu sa oras ng kamatayan ng katawang laman, ang espiritu humihiwalay sa katawang-laman, ngunit pinapanatili ang semi-materyal na balot, na kung saan bibigyan namin ang pangalan na peri-espiritu.


Ito ay semi-materyal na balot, na animo ay hugis tao, para sa mga espiritu,ay binubuo ng isang mala-hanging (gas) pluwido, na bagaman hindi nakikita sa kanyang pangkaraniwang kalagayan ay mayroon ng ilan sa mga katangian ng materya. Samakatuwid ang Espiritu ay hindi isang matematikal na punto, hindi isang abstraksyon, kung hindi ay isang tunay nilikhang may buhay, limitado at nakapalibot, at ang kulang lamang ang mga katangian na ito ay maaaring makita at kalinawan upang ipakita ang kanyang pagkakahawig sa mga tao.

Kung ganoon nga, di umano, bakit hindi ito maka akto sa materya? Dahil ba sa katangian nitong pluwido? Subali’t ito ay hindi kabilang sa mga pinaka bihirang pluwidong, ang mga na tinatawag naming "di makita o maisip," tulad ng kuryente, halimbawa, kung saan matatagpuan ng tao sa kanyang pinakamakapangyarihang mga motor?

Hindi kaya ang hindi maisip na liwanag ay gumawa ng isang kemikal na pagkilos sa isang materyang may pag-iisip?

Hindi namin maunawaan ang mga tiyak na kalikasan ng peri-espiritu, subali’t kung ito ay nabuo sa pamamagitan ng mga materyang elektrikal, o ng iba pang materya na may kapinuhan, bakit hindi ito dapat na magkaroon ng katulad na mga katangian ng pagkilos tulad ng elektisidad, kapag sa samasailalim ng direksyon ng isang kalooban?

Halaw mula sa “The Mediums Book”, Allan Kardec

2011-01-017

Destination of the Soul (Patutunguhan ng kaluluwa)

Saan napupunta ang mga kaluluwa matapos ang kamatayan?

Ayon sa pangkaraniwang paniniwala, ang kaluluwa ay napupunta sa langit o sa impiyerno; nguni’t saan ang langit, at saan ay impiyerno? Ang mga tao dati nang sinasabi na ang langit ay ''sa mataas, "at impiyerno,''sa ibaba;" nguni’t ano ang "nasa itaas ," at ano ang "nasa ibaba?"

Sa Uniberso, dahil napatunayan na ang Lupa (Earth) ay bilog, sa pamamagitan ng paggalaw ng lahat ng planeta at mga bagay sa kalawakan , kung ano ang "nasa itaas" ngayon, ay magiging "nasa sa ibaba" pagkalipas ng labindalawang oras dito, at ito sa buong napakalaking lawak ng walang katapusang espasyo.

May katotohanan, sa pamamagitan ng sinasabing "ibaba," maaari naming din na maunawaan ang "malalim na dako ng lupa;" nguni’t ano ang mga "malalalim na lugar," dahil ngayon ang mga hiyolohista (geologists) may sinimulan upang maghukay sa loob ng globo?

Ano ang mangyayari sa mga konsentrikong kabilugan na tinatawag na "langit ng apoy," ang "langit ng mga bituin," atbp, dahil tayo ay may kaalaman na ang Lupa ay hindi ang sentro ng Uniberso, at ang ating haring Araw ay isa lamang sa mga hindi mabilang na mga Araw na lumiwanag sa kalawakan, at ang bawa't isang Araw kung saan ito ay ang sentro ng isang pamplaneta sistema ng kanyang sarili?

Saan na ngayon ang kahalagahan ng Lupa, ang nawala sa bilang na ito sa kanyang kalakihan sa kalawakan?

At sa anong di makatarungang pribilehiyo ang dapat nating ipalagay na ito hindi mapapansin tulad ng butil ng buhangin, ni hindi maihahalintulad sa kanyang kalakihan, ang posisyon nito, o anumang kakaibang uri ng mga katangian, tanging ito lamang baga ang daigdig na may mga nilalang na may mga karunungan?

Ang katwiran ay umaayaw tanggapin ang gayong walang saysay na walang hanggang buhay; at ang sentido komon ang magsasabi na ang lahat ng daigdigan sa Uniberso ay tinatahanan ng mga nilikha, at sa gayon, bilang tahanan, sila man magibigay ng kanilang kalakhan sa dimensyon ng mga kaluluwa.

Halaw mula sa “The Mediums Book”, Allan Kardec

2011-01-016

Inhabitants of Universal Space (Mga Nananahan sa Kalawakan)

Ano ang pumupuno sa kalawakan?

Ang mga kaluluwa, na siyang pumupuno sa kalawakan, ay yaong mga tinatawag nating espiritu: at ang mga espiritu ay walang iba kungdi ang mga kaluluwa ng mga tao na nag-iwan na ng kanilang katawang-laman.

Kung ang mga espiritu ay mga nilalang na kaiba sa ating mga sarili, ang kanilang pagkakaroon ay magiging kathang isip lamang; ngunit, kung tinatanggap natin na mga kaluluwa ay walang kamantayan, kailangan din nating tanggapin na espiritu ay walang iba kungdi ang mga kaluluwa.


At, kung ating tanggapin na ang kaluluwa ay walang kamatayan, kailangan din nating tanggapin na ang unibersal na espasyo ay tinatahanan ng mga kaluluwa, gayun ding dapat na tanggapin na ang mga espiritu ay nasa sa lahat ng dako. Hindi natin maaring itanggi ang pagkakaroon ng mga espiritu at ang pagkakaroon ng mga kaluluwa.

Halaw mula sa “The Mediums Book”, Allan Kardec

2011-01-015

Types of Spirits (Uri ng mga Espiritu)

Ano ang mga uri ng Espiritu at kung saan ang mga ito ay nananahan?


Ang mga uri ng Espiritu:

1. May kataasan
2. May kababaan
3. Hibang – hindi masasabing may kataasan o may kababaan, mapanukso

Saan nananahan ang Espiritu

Ang mga Espiritu na nagkatawang laman (incarnado) ay nananahan sa iba at ibang  daigdigan sa buong sangkalawakan (universe).  Samantalang ang mga espiritu na hindi nagsakatawang laman (desincarnado)  ay nananatili sa bayan  ng mga espiritu na nasa ganitong kalagayan sa mahaba o maikling panahon na tinatawag na espiritung naglilibot(errant, wandering spirit) ay hindi sumasakop ng isang pirmihan o nakatakdang rehiyon.  Sila ay nasa lahat ng pook, sa kalawakan, sa paligid natin, namamalas tayo at nakikihalo sa atin palagi.  Sila ang mga nilalang na nananang kasama natin na hindi nakikita, patuloy na gumagalaw at abala sa atin, sa lahat ng panig.


Ang mga Espiritu ay patuloy na kumikilos sa daigdig na pangkaluluwa at sa daigdig ng mga hugis a anyo.  Sila ay kumikilos sa laman (matter) at sa kaisipan na siyang bumubuo ng isang kapangyarihan ng kalikasan na siya ring episyenteng sanhi (efficient cause) ng maraming uri ng penomena na hindi maipaliwanag o hindi maintindihan ng mga tao. Ang mga espiritista ang nakapagbibigay ng rasyonal o may lohikang (rational) pagpapaliwanag sa mga penomenang ito.

2011-01-014

Medium (Talaytayan o Kasangkapan)

Ano ang tinatawag na talaytayan (Medium)?

Bahagi ng talaytayan ay ang kaangkinan ng isang kaluluwa.

Ito ang mensahe.(Abotsabi 12/1/93 –Arkanghel Rafael):

Ang isang talaytayan ay tagapamagitan ng kaitaasan at kalupaan. Mula sa Diyos, Espiritu at Katotohan. Ito ang daan upang ang diwa ay inu-ugnayan ng liwanag.

Ang diwa na may kalagayang napali at napanday na sa naunang buhay na dinaanan: bawa’t danasin ay karunungan at bawa’t karunungan ay tiisin.
Ang mga suliranin at pagsubok, tiisin at pakikipag-ugnay.


Ano ang kahalagahan ng talaytayan?

Sa pamamagitan ng talaytayan ay nagkakaroon ng ugnayan ng diwa sa kapwa diwa, kabuuan ng pag-iisip, damdamin at kalooban. Kapag walang katahimikan, walang kapayapaan, at kung walang kapayapaan, walang katalinuhan.

Bilang patotoo ng tungkulin ng mayroon ng mabigat na pananagutan ang mga talaytayan ay isa sa mga haligi ng isang samahan. Katulad ng haliging isang tahanan na kapag ang haligi ay matatag, ang bahay ay matatag. Kung ito ay mahina ang bahay ay mahina rin.

Ano ang paghahandang dapat gawin ng talaytayan?

Hindi lamang isang araw bago tumupad ng tungkulin ang pagahahanda , kungdi sa buong sandali at kalagayan ng isang talaytayan.

Ang paghahanda ng isang talaytayan ay sa pamamagitan ng paglilinis ng tatlong kaangkinan; isipan, damdamin at kalooban, pagpapadalisay at pagpapakabuti sa kaugalian ay hindi isinasagawa sa isang araw lamang upang magkaroon ng pagsulong ang kanyang karapatan.

Lahat ng iyan ay umiikot sa buhay kahapon, sa buhay ngayon, at sa hinaharap. Kailangan ang paghahanda kahapon, ngayon at sa hinaharap. Hawakan ang kabuuan upang huwag lumihis patungo sa daan ng Kaliwanagan.
Ang mga talaytayan ay kailangang maging maingat, may mga bahagi ng karunungan na di kailangan agad na lulunukin sapagka’t kayo ay mabibilaukan. Dapat ito ay pinag-aaralang mabuti, tulad ng pagkain na kailangang nguyain upang maging pino.

Kailangan niyang matutuhan ibigay ng buong buo ang kanyang sarili na hindi magkukulang ang bahagi ng laman. “Ang lahat ay ibibigay, humiling ka sa Kanyang pagpapala.”

Ang tumutupad ng tungkulin ay hindi natatakot tumupad ng tungkulin o walang kinatatakutan. Ang nagbibigay ay may matatanggap, ang kailangan lamang ay hawakan ang kanyang sarili sapagka’t “hindi kayo nag-iisa, wala kayong magagawa kungdi ang makakapit sa puno ng ubas.”

Ano ang dapat ipanalangin ng mga nakikinig sa talaytayan?

Ang mga nakikinig ay may lakas na ibinibigay upang maging wasto at mapayapa ang kaisipan ng bawa’t isang nakikinig.Kung ibig tulungan ang isang gumaganap na talaytayan. Mag-ambil ng panalangin: “Nawa ay masupil ng talaytayan ang katawang lupa sa sandali ng kanyang pagtupad.”

Paano susuriin ang mga ipinahahayag ng talaytayan?

Sa patanggap ng isang nakikinig ng karunungan ay itanong niya sa kanyang sarili, “saan ka dinala, sa kaliwanagan o sa isang ang kaliwanagan ay tinatakpan?”

Ang paggamit ng puting damit o roba ng mga talaytayan.

Sa diwa, ang puting damit ay ang kalinisan ng pag-iisip, kadalisayan ng mithiin na maging kasangkapan na maging mabuti. “Ang kay Caesar ay kay Caesar, ang sa Panginoon ay sa Panginoon.” Ito ay inuugnay sa talaytayan.

Sa literal, ang puti o anumang uri ng kulay ng damit ay walang kinalaman o saligan ng isang kaluluwa sapagka’t ito ay materyal lamang.

Alalayan, bantayan ang mga talaytayan; ang bawa’t pagkakamali na inyong makita, bilang pag-ibig ibigay ninyo upang mapag-aralan at maituwid ng kanyang sarili. May nagbibigay at may tumatanggap mahalaga ang pagsisikap ng lahat upang hindi saktan ang damdamin, kung hindi upang siya ay itayo, pakinisin at patibayin.

2011-01-013 

Spiritual Elements (Mga Elementong Espirituwal)

Anu-ano ang limang elementong espirituwal?

Ang mga konsepto na ating tinatawag na, panahon (time) at espasyo (space), liwanag (light), kimpal (mass) at lakas o enerhiya (energy), ay mga bahagi ng mga nilikha ng Diyos at maaaring ituring na repleksyon ng Kanyang mga katangian.

Dahil ang Diyos ay naalinsunod sa Kanyang mga gawa na hindi pabago-bago, kapag pinag-aaralan ang Banal na Aklat, hindi tayo dapat mamangha na makita na mayroong mga katumbas na elemento sa daigdig ng Espiritu at ng daigdig ng kalupaan. Ang pag-aaral sa mga elementong ito ay may mahalagang papel na ginagampanan upang maunawaan kung sino ang Diyos, kung sino tayo, ano ang darating at paano tayo tutungo doon.

1. Ang espirtuwal na panahon (spiritual time). Ito ay kumakatawan sa mga pauli-ulit na kaganapan na hindi hinapit sa pisikal na lineyar (physical time) na may oras, minuto at segundo na aspeto ng panahon. Karamihan sa mga ito ay may kaugnayan sa mga kaganapan sa mundong darating.

2. Ang espasyong espirituwal (spiritual space). Ito ay tumutungkol sa mga dimensyon lampas sa ating dimensyong na pisikal, kasama ang mga aspeto ng mga yaon na itinakda sa lupa para sa atin.

Sa espasyong pisikal (physical space), mayroon tayong tabernakulo, templo o altar kung saan ang Diyos ay pinaniniwalaang nananahan sa ating kalagitnaan. Ang espasyong ito ay kinakailangan upang ang espirituwal na liwanag ay maipahatid, tulad din na ang pisikal na espasyo ay kailangan sa pisikal na liwanag.

3. Ang espirituwal na liwanag (spiritual light). Ito ang salita ng Diyos o kaya ang perpektong kalooban ng Diyos na palagian. Ang kaluwalhatian ng Diyos ay ipinakikita sa pamamagitan ng liwanag sa Banal na Aklat. Tulad ng sa sitas ng Banal na Aklat, “ Ang salita mo’y ilawan sa aking mga paa, at liwanag sa aking landas.” (Psalmo 119:105)

Isa sa mga pinakamalinaw na pagkalito ng mga tao na may pagsasaalang-alang sa kanilang pang-unawa ng Banal na Aklat ay maaaring bigyan diin sa pamamagitan ng kung ano ay isang pangkaraniwang literal na paggamit at hindi tamang interpretasyon.

Ang pisikal na liwanag (physical light) ay yaong liwanag na nakikita ng mga mata.

4. Ang espirituwal na kimpal (spiritual mass). Ito ay tumutungkol sa kahit anong nilikha, may katawang-laman o wala man na ang tungkulin ay maisakatuparan ang kalooban ng Diyos. Ang mga halimbawa: mga arkanghel at mga anghel, mga banal na alagad ng Diyos, mga dakilang guro, mga pastor, na siyang naghahatid ng layunin ng Diyos.

Ang pisikal na kimpal (physical mass) ay tumutungkol sa kahit anong nilikha na may katawang laman may buhay man o wala tulad ng tao, hayop, gusali, halaman at iba pa.

5. Ang espirituwal na lakas (spiritual energy). Ito ang mga lakas na resulta ng mga gawa ng mga anghel, ng Banal na Espiritu, ni Hesukristo na naipakita sa mga milagro at rebelasyon.

Ang pisikal na lakas (physical energy) ay mga lakas na naroon sa mga nilikha o mga bagay na kinakikitaan ng lakas katulad ng lakas ng tao (strength) na nakagagawa at nakabubuhat ng mabibigat na bagay, lakas ng kabayo (horsepower) na nagpapakita ng lakas ng pagbuhat o paghila ng mga tao o mga bagay, lakas ng makina (mechanical energy) na nakikita sa pagbuhat, paghila, paglilipat ng mga malalaki at mabibigat na mga bagay at lakas ng elektrisidad (electrical energy) na makikita sa pagpapatakbo ng mga gamit sa pamamagitan ng kuryenteng elecktrikal na nakakapagpadali sa gawain ng mga tao.

2011-01-012

Disencarnate Spirits (Batlaya, Kabatlayaan)

Ano ang tinatawag na Batlaya?

Sa ating pakikipag-aral tungkol sa Espiritu, laging ipinapa-alala sa atin ng mga sa atin ay nagtuturo na suriin ang mga sa atin ay ipinagkakaloob na mga aralin. Mayroon mga espiritu na nagbibigay ng pag-aaral sa pilosopiya, moral at mataas na antas ng karunungan. Kadalasan sa ating mga natatanggap na abotsabi ay mula sa mga banal na alagad ng kaitaasan tulad ng Espiritu Santo, Hesus ng Nazareth, at mga Arkanghel.

(Halaw mula sa Abotsabi, May 19, 1993 – Arkanghel Miguel)

Kabatlayaang hinahanap at tinatawag ng bawa’t isa ay isang katagang ang ibig sabihin ay mga kaluluwang lumaya sa maraming uri ng pagkakasala.

Batlaya rin ang tinatawag sa isang nilalang na nag-iwan ng laman sapagka’t sumakabilang buhay; naghanap ng lalong angkop sa tunay na pangangailangan ng kaluluwa ng tao; nagdanas ng ibayong hirap na hindi pa ninyo dinadanas sa panahon ng kapamuhayang inyong itinataguyod.

Kaya nga at ang katagang kabatlayaan ay yaong mga pinalaya ng Amang Makapangyarihan sa mga bagay na hindi maiiwasan ng tao sa sanlibutang ito na katulong ng kaitaasan upang ipalaganap ang mga aralin ng Amang Makapangyarihan sa pamamagitan ng mga abot-sabi. Ang mga halimbawa ay ang mga sulong na Espiritu, arkanghel, apostol, at mga santo at mga santa.

Ano ang tinatawag na espiritu pamilyar?

Mayroon namang nagpapahayag ng kanilang mga karanasan ng dating naging kabuhayan sa lupa.Paminsan-minsan ay nakakatanggap rin tayo ng mga pahayag mula sa ating mga kakilala dito sa lupa na nag-iwan na ng katawang-laman upang tayo ay makapulot ng mga karanasan, mapait man o mabuti man sa kanilang kinaroroonan upang imulat ang mga naririto sa lupa sa mga natamong pag-aaral sa likod ng libingan at mga kanilang naging mga pagkukulang habang nabubuhay sa kapatagang-lupa.

Sila ay ang ating mga kamag-anak na lumisan na sa lupa, mga naging Pangulo ng ating bansa, mga bayani, na atin nang nakilala, kaya nga tinawag na mga espiritu na pamilyar.

Hindi matatawag na batlaya ang mga nilalang na nag-iwan na ng laman na hindi pa pinalalaya ng Amang Makapangyarihan sa mga bagay na hindi maiwasan ng tao sa kapatagang lupa. Gayon pa man sila ay pinahihintulutan makapamahayag sapagka’t mayroon din silang araling maibabahagi, mula sa buhay dito sa lupa ay narating na nila ang dako pa roon na siyang ipanapabatid sa atin ang kanilang kalayagan doon, minsan may nagsasabing nais nilang bumalik upang tapusin ang mga pangakong sinumpaan at mga tungkuling na di natupad at inabot na na kamatayan.

Paano makaka-akit ng isang banal na Espiritu/Batlaya na nakapagdadala sa lalong maunlad na kabatiran?

(Mula sa Abotsabi ng San Antonio de Padua)

Ang tao ay maaaring maka-akit ng isang Banal na Espiritu o Batlaya kung dala-dala niya ang mga sumusunod na pangangailangan:

1. Kailangang maging kauri ang inyong diwa sa kalinisan at kadalisayan sa kawagasan ng simulain at layunin at ng kasalukuyang kalagayan ng inyong sarili.

2. Kailangan ng malinis na buhay, malinis at wagas ang inyong puso.

3. Kailangan na mapayapa ang damdamin at pinaghaharian ng isang matapat na pag-ibig sa kapwa ang inyong puso.

Ano ang mga damdamin na pinaghaharian ng matapat na pag-ibig sa kapwa?

1. Damdamin na ang tinutudla ay ang kaluluwa ng kapwa tao sa larangan ng pag-amin na ito ay kapatid, na ito ay kaisang kaluluwa, na ang damdamin nito ay siya ring inyong damdamin, na ang hirap nito ay siya rin hirap ninyo, na ang kaligayahan nito ay siya rin kaligayahan ninyo.

2. Yaong tibukin na sadyang makapangyarihan na hindi lumilingon ng kapwa tao, hindi lumilingon sa anumang balakid o sagabal o kalagayan ng anumang uri ng tao. Hindi ninyo nakikita ang kanyang mga kahinaan, hindi ninyo inaalintana ang kanyang mga pagkukulang, hindi ninyo ina-alagata kung mayroong igaganti o wala.

3. Ang tibuking magkakapatid na sadyang wagas at tapat na hinahangad ninyo ang kanyang pagligaya, ang kanyang kaligtasan sa mga paghihirap at kapangyayaan sapagka’t nakikita ninyo ang ilaw ng kanyang kaluluwa at ito ay iniisip ninyo na kaisa ninyo.

4. Yaong damdamin na walang isinasa-alang alang kung hindi ang pakikipag-isang diwa sa larangan ng paglilingkod, at dahil dito, handa kayong maglingkod na may pagpapakasakit, na hindi patanaw kung hindi lubus-lubusang taimtim sa inyong kalooban at damdamin. Ang inyong nakikita ay kung papaano iniibig ninyo siya at paglingkuran.

5. Ang tibuking hindi nagpaparusa, na bagaman at taksil at salanggapang ang inyong kapatid at hindi karapat-dapat sa inyong pagmamahal o sa inyong tulong, wala sa inyo ang bagay na iyan. Hindi ninyo aalagatain kung dapat parusahan ang isang nagkamali sa inyo o sa lipunan, ang aalagatain ninyo ay ang sapupuhin siya at iangat at magbalik sa kanyang tunay na uri, sa Ama.
Ang lahat ng tao, may potensiyal at pundamental, ay talaytayan ng mga lakas ng mga banal na batlaya.

2011-01-002