Sa pag-aaral ng mga abot-sabi (komunikasyon mula sa mga talaytayan), tatlong bagay ang huwag kaliligtaan, iyong mga katanungang bakit, paano at kailan. Diyan sa tatlong bagay na iyan paikutin ninyo ang abot-sabi na inyong tinanggap at inyong matutunan kung ano ang hinihingi sa inyo.
Halimbawa
Mga kapatid, hindi matatapos ang panahon ng mga tao hangga’t siya ay mayroon ng gawain na dapat gampanan. Hindi natatapos ang kanyang pag-aalinlangan habang natatanaw niya ang mga bagay na dapat niyang matutuhan. Sa dalawang bagay na ito magagamit ninyo ang inyong panahon upang inyong baha-bahaginin sa mga bagay na inyong tuparin sa buhay na iyan, hindi lamang ang pagkain ng laman, hindi lamang pagkain ng espiritu ang dapat alagatain ng tao. Ang dapat niyang alagatain ay alagatain niya kapwa ang bagay na ito sapagka’t gaya ng aking sinabi sa inyo, ang manipestasyon ng karunungan ng espiritu ay sa pamamagitan ng kanyang kabuhayang materya.
(Halaw sa abot-sabi ng Arkanghel Rafael, 03/16/1990)
Bakit:
Bakit hindi matatapos ang panahon ng mga tao hangga’t siya ay mayroon ng gawain na dapat gampanan?
Hindi natatapos ang panahon ng mga tao hangga’t hindi natatapos ang pag-aalinlangan ng tao, hangga’t nauunawan at natatanaw niya ang mga bagay na dapat pa na matutuhan.
Paano?
Paano magagamit ng tao ang panahon upang mabahabahagi ito sa mga bagay ng tuparin?
Magagamit ng tao ang panahon sa pamamagitan ng pagbabahagi ng mga bagay ng tuparin; dapat alagatain ng tao hindi lamang ang pagkain ng laman kung hindi gayon din ang pagkain ng espiritu, at alagatain ang dalawang bagay na ito nang magkasabay nguni’t may kabalansehan.
Kailan?
Kailan makikita ang manipestasyon na mayroon nang karunungan ang espiritu?
Makikita ang manipestasyon na mayroon ng karunungan ang isang espiritu sa pamamagitan ng kaniyang kabuhayan sa ibabaw ng lupa. Kung mamamasdan na ang isang tao ay hindi nagbabago ng kanyang mga gawi ang ibig sabihin, kulang pa ang natutunan at kailangan pa ng patuloy na pag-aaral sa pamamagitan ng mga danasin at tiisin. Samantalang makikita na ang tao ay nagkaroon na ng karunungan kapag napanday na, napali na, kinakikitaan na kahit na maliit na pag-ibig sa kapwa na may gawa at nakapaglilingkod ng walang hinihintay na kapalit.
Ano ngayon ang hinihingi ng abotsabi?
Bilang paghahanda, bago lumisan ang tao sa lupa gampanan na ang mga bagay na dapat gampanan, alisin ang mga pag-aalinlangan, paunlarin ang sarili at bakahin ang kamangmangan sa pamamagitan ng pag-aaral ng mga bagay tungkol sa laman at gayon din ang sa espiritu na may kabalansehan.
2011-01-003
No comments:
Post a Comment